Далонню міжволі дакранаюся да сцяны з пачарнелага бярвення. Яно, напэўна, яшчэ памятае рукі, якія ўкладвалі яго вянкамі ў зруб. Дык вось як жылі берасцейцы! Вузенькія - ледзь размінуцца двум пешаходам - вулачкі. Бярэсце было і домам, і крэпасцю нашых продкаў, якія аблюбавалі сабе высокае міжрэчча Буга і Мухаўца і заклалі ў сівой старажытнасці горад, які даў пачатак цяперашняму Брэсту.
На думку археолагаў, Бярэсце - унікальны ў сваім родзе аб'ект. Адна з выяўленых тут пабудоў мае 12 вянкоў, якія цалкам захаваліся. Такіх пабудоў да гэтага часу нідзе не знаходзілі.
Высока ў неба падняліся ажурныя металічныя канструкцыі будучага музея. Вонкава ён будзе нагадваць велізарны зруб, выкананы са шкла і бетону. Галоўным яго экспанатам, вядома, стане раскапаны квартал Бярэсця.